ها يكلبي اشلون واحبابك جفوك
وحالك اعليهم مثل ورگه ابخريف
يابسه وطاحت على اطراف الطريق
والهوه ايذريهه كلساع برصيف
ظاله اعيونك تناطر علطريق وبابك
امشرعه عليهم چن مضيف
بلكي من عدهم خبر تنطر يجيك
بلكي من ريحتهم ابنادم يضيف
ايس وسد بابك ونام استريح
بطل اللهفه عليهم والرفيف
المن اترف شوگ منهوا اتظن يجيك
كافي بطل ياگلب لتظل خفيف
اقسي وياهم قسو كلش عليك
كافي بطل ادموعك ولتظل ضعيف
شوف حالك وين چنت انت وصرت
الظهر محني وجسد كلش نحيف
بطل انسى وعيش عمرك مايجوك
الياوكت جرحك يظل ينزف نزيف
اشحصلت منهم ابعشرتهم معاك
جَرّحوك وچنت شفاف ورهيف
كافي انصحك ياگلب انساه هواك
خزن وياذي الجرح واصبح كليف
الشاعر صالح الجابري
ليست هناك تعليقات:
إرسال تعليق